پێستی تۆ

Friday, 10.23.2020, 12:56 AM (GMT+2)

مەیک ئەپ » دەست و نینۆک

هۆکار و چارەسەرەکانی نینۆکی لاواز

(2300 بینراوە)   | Thursday, 05.25.2017, 08:00 AM |



ڕەنگ و ڕووی نینۆکەکان  زۆربەی جار ئاماژە بە تەندروستی خاوەنەکەی ئەکەن، نینۆکی تەندروست ئەبێت ئەو بەشەی بە گۆشتەکەوە نوساوە ( Nail platte) ڕەنگەکەی پەمەیی بێت وە ئەو بەشەی کە لە گۆشتەکە دەرچووە (Free edge) ڕەنگەکەی سپی بێت. هەروەها ساف بێت و درزی نەبردبێت.

نینۆک لە سێ چین پێک هاتووە، چینی سەرەوەی ئەکرێت زبر ببێت و توێژ هەڵبدات یان درز ببات بەهۆی لاوازی نینۆکەکەوە،  چەند هۆکارێک هەیە  لە پشت ئەم لاواز بوونەی نینۆک  هەندێکیان ناوەکین وە هەندێکیان دەرەکین، گرنگترینیان ئەمانەی لای خوارەوەن:


هۆکارە ناوەکیەکان:

١-ئەکرێت هۆکارەکە نەخۆشی بێت بۆ نمونە فشەڵی ئێسکەکان، غودەی دەرەقی، شێرپەنجە. بەڵام ئەمانە تەنها هۆکار نین بەڵکو  ئەشێت خراپی سوڕی خوێن و کێشەی گورچیلە و نەخۆشی شەکرەیش هۆکار بن بۆ لاوازی نینۆکەکان.

٢-کەمی ڤیتامین  A, B2, B3, B5, B8, D  ، بە هەمانشێوە  کەمی کانزاکانی وەک ئاسن و کالسیۆم و زینک  هەروەها کەمی پرۆتین (ترشی ئەمینی Cysteine ) لە لەشدا ئەبێتە هۆی لاواز بوونی نینۆک.

٣-دڵە ڕاوکێ و کەم خەوی.


هۆکارە دەرەکیەکان:

١- ئاو بە گەورەترین دوژمنی نینۆک دائەنرێت،  بەردەوام تەڕکردن و ووشکبوونەوەی نیۆک هۆکارێکی سەرەکیە بۆ لاوازکردنی نینۆک و درزبردن و توێژ هەڵدانی. هەروەها ماددە پاککەرەوەکانی وەک شامپۆی قاپ شتن و جل شتن، بەنزینی جل شتن، ترپەتینە...هتد .

٢- بەکارهێنانی ئەسیتۆن بۆ لێکردنەوەی بۆیە.  هەروەها بەکارهێنانی نینۆک بڕ  کاریگەری خراپی لەسەر نینۆکەکان هەیەو ئەبێتە هۆی درز بردنیان.


چارەسەرەکان:

١-  پێویستە خواردنی تەندروست و جۆراو جۆر بخۆیت، لە گرنگترین ئەو خواردنانە هێلکە، ماسی ، جگەر، گۆشت، شیر، چەرەس و سەوزە و میوە.

٢- بەکارهێنانی دەستکێش لە کاتی ئەنجامدانی ئەو ئیشانەی کە ئاو  و ماددە پاکەرەوەکانی تێدا بەکاریەت یان هەر ئیشێکی تر کە پەستان بخاتە سەر نینۆکەکانت . هەروەها  دوورکەوتنەوە لەو خوەی کە  نینۆکەکانت  وەک کەلو پەلی ئیش بەکاربهێنیت بۆ نمونە بۆ قوتوو هەڵپچرین.

٣-دوور کەوتنەوە لە بەکارهێنانی ئەو بۆیە لێکەرەوانەی کە ئەسیتۆن لە پێکهاتەکانیاندا هەیە.

٤- بەکارهاینانی بڕبەن لە جیاتی نینۆک بڕ بۆ کورتکردنەوە و ڕێک کردنی نینۆک.

٥- نینۆکی زۆر درێژ هۆکارە بۆ شکانی خێرای نینۆک.  هەروەها  هەرگیز مەهێڵە لە یەک هەفتە زیاتر بۆیەی نینۆک بە نینۆکتەوە بمێنێتەوە ئەگەر نا ئەبێتە هۆی گۆرانی ڕەنگی نینۆکەکەت.

٦-شەوانە چەورکردنی نینۆکەکانت بە کرێمی دەست  هەروەها چەورکردنی گۆشتی قەراغی نینۆکەکانت (cuticle) زەیتی ڕووەکی  یان فازەلین.

٧- دوور بکەوەرەوە لە دانانی نینۆکی دەستکرد، ڕاستە ئەم نینۆکانە جوان و سەرنج ڕاکێشن بەڵام ئەبنە هۆی لاواز کردن و هەستیار بوونی نینۆکە سروستیەکانی خۆت.

٨- بەکارهێنانی بەهێزکەری نینۆک  و خواردنی ڤیتامین و کانزاکان بە شێوەی حەب، گرنگترینیان ڤیتامین B8 (بیۆتین) و ترشی ئەمینی Cysteine.

چاوەڕێ مەکە بەخواردنی ئەم ڤیتامینانە دەست بەجێ نینۆکەکانت بەهێز و تەندروست ببن بەڵکو  ماوەی ٦-٩ مانگ ئەخایەنێت.





(دەنگدراوە: 1)

بابەتی لەیەکچوو



وێنە

کتێبی (پێستی تۆ)