جۆرەکانی پێست

پێست بە دوو ڕێگا جۆرەکەی دیاری ئەکرێت، ئەوانیش:
ڕێگای یەکەم بەگوێرەی ئەو چەوریەی (Sebum)کە لە لایەن پێستەوە دەرئەدرێت. بەم ڕێگەیە پێست دابەش ئەکرێت بەسەر چوار جۆردا ئەوانیش:

- پێستی چەور

- پێستی وشک

- پێستی ئاسایی

- پێستی تێکەڵ

۲ـ ڕێگای دووەم بۆ دیاری کردنی جۆری پێست لەسەر بنەمای کاریگەری تیشک و خۆر و ڕەنگی پێستە، واتا ئایا ئەو پێستە هەتا چەندە لە دەنکۆڵە ڕەنگدارەکانی (Melanin ) تێدایە. شایانی باسە مێلەنن ئەو بۆیەیە لە پێستدا کە ڕەنگی پێستەکە دیاری ئەکات. بەم ڕێگایە پێست دابەش ئەکرێت بەسەر ٦ جۆردا ئەوانیش:

پێستی جۆری ۱

ئەو کەسانەی ئەم جۆرە پێستەیان هەیە ئەم نیشانانەی خوارەوەیان تێدایە:
ـ ڕەنگێکی زۆر کاڵ و سپیان هەیە
ـ بوونی شڵی (نیشانە سورەکان)
ـ ڕەنگی چاویان کاڵە
ـ قژیان زەردی کاڵ یان سور باوە
ـ کاتێک خۆیان ئەدەنە بەر تیشکی خۆر ئەسمەر نابن بەڵکو سور هەڵئەگەڕێن و زوو ئەسوتێن.

پێستی جۆری ۲

ئەو کەسانەی ئەم جۆرە پێستەیان هەیە ئەم نیشانانەی خوارەوەیان تێدایە:
ـ پێستیان سپیە
ـ چاویان کاڵە
ـ قژیان زەردی ئاڵتونیە
ـ کاتێک خۆیان ئەدەنە بەر تیشکی خۆر هەندێک جار ئەسمەر ئەبن، هەمیشە سور ئەبنەوە و زوو ئەسوتێن.

پێستی جۆری ۳

ئەو کەسانەی ئەم جۆرە پێستەیان هەیە ئەم نیشانانەی خوارەوەیان تێدایە:
ـ زۆر سپی نین واتا پێستیان کەمێک ڕەنگی تێدایە
ـ زۆربەی جار چاویان قاوەییە هەندێک جاریش کاڵ
ـ قژیان قاوەیی یان زەردی تۆخە
ـ کاتێک خۆیان ئەدەنە بەر تیشکی خۆر بە ئاسانی ئەسمەر ئەبن، هەندێک جاریش سور هەڵئەگەڕێن، کەم جاریش ئەسوتێ.

پێستی جۆری ٤

ئەو کەسانەی ئەم جۆرە پێستەیان هەیە ئەم نیشانانەی خوارەوەیان تێدایە:
ـ ئەسمەری کاڵن
ـ ڕەنگی چاویان تۆخە
ـ ڕەنگی قژیان تۆخە
ـ کاتێک خۆیان ئەدەنە بەر تیشکی خۆر بە ئاسانی ئەسمەر ئەبن، سور هەڵناگەڕێن و زۆر بەدەگمەن ئەسوتێن.

پێستی جۆری ٥

ئەو کەسانەی ئەم جۆرە پێستەیان هەیە ئەم نیشانانەی خوارەوەیان تێدایە:
ـ ئەسمەری تۆخن
ـ ڕەنگی چاویان زۆر تۆخە
ـ ڕەنگی قژیان زۆر تۆخە
ـ کاتێک خۆیان ئەدەنە بەر تیشکی خۆر زۆر بەخێرایی و زۆریش ئەسمەر ئەبن، زۆر بە دەگمەن ئەسوتێن.

پێستی جۆری ٦

ئەو کەسانەی ئەم جۆرە پێستەیان هەیە ئەم نیشانانەی خوارەوەیان تێدایە:
ـ جۆری پێستی ئەفریقیەکانە
ـ پێستیان زۆر تۆخە
ـ چاویان ڕەشە
ـ قژیان ڕەشە
ـ کاتێک خۆیان ئەدەنە بەر تیشکی خۆر پێستیان ئەسمەرتر ئەبێت و ناسوتێن.